Jos 13 | NdeIBE | STEP | UJoshuwa esemdala njalo eseluphele kakhulu, uJehova wathi kuye, “Usuluphele kakhulu, njalo lokhu usasalelwe yilizwe elikhulu kakhulu okumele ulithumbe.

Joshua 13

Ilizwe elisezathunjwa

1 UJoshuwa esemdala njalo eseluphele kakhulu, uJehova wathi kuye, “Usuluphele kakhulu, njalo lokhu usasalelwe yilizwe elikhulu kakhulu okumele ulithumbe.

2 “Nanti ilizwe elisaseleyo: zonke izabelo zamaFilisti lamaGeshuri: 3 kusukela emfuleni uShihori empumalanga yeGibhithe kusiya esabelweni se-Ekhroni enyakatho, lonke libaliswa njengelamaKhenani (isabelo sababusi, e-Ashidodi, e-Ashikheloni, Gathi le-Ekhroni – esama-Avithi); 4 kusukela eningizimu, lonke ilizwe lamaKhenani, kusukela e-Ara yamaSidoni kusiyafika e-Afedi, isabelo sama-Amori, 5 indawo yamaGebhali; layo yonke iLebhanoni ngempumalanga, kusukela eBhali Gadi ngaphansi kweNtaba yeHemoni kusiya eLebho Hamathi.

6 “Njengalabo abakhele ezabelweni ezisezintabeni kusukela eLebhanoni kusiya eMisirefothi Mayimi, okutsho wonke amaSidoni, mina ngokwami ngizabaxotsha phambi kwabako-Israyeli. Wobani leqiniso lokuthi lelilizwe labelwe abako-Israyeli ukuze libe yilifa labo njengokulilaya kwami, 7 njalo lilabe njengelifa phakathi kwezizwana eziyisitshiyagalo lunye lengxenye yesizwana sakoManase.”

Ukwabiwa kwelizwe elisempumalanga yeJodani

8 Eyinye ingxenye yakoManase, amaRubheni lamaGadi yayizuze ilifa eyalinikwa nguMosi empumalanga yeJodani njengoba yena inceku kaJehova ayebaphe lona.

9 Lasuka e-Aroweri emaphethelweni oDonga lwe-Arinoni, lasedolobheni eliphakathi kodonga, njalo ligoqela amagceke eMedeba kusiyafika eDibhoni,

10 lamadolobho wonke kaSihoni inkosi yama-Amori, owabusa eHeshibhoni, kusiyafika emgceleni wama-Amori. 11 Laligoqela iGileyadi, isabelo sabantu baseGeshuri leMalakha, leNtaba yonke yeHemoni leBhashani yonke kusiyafika eSalekha –

12 okutsho ukuthi, umbuso wonke ka-Ogi eBashani, yena owabusa e-Ashitharothi le-Edireyi njalo wayengomunye wamaRafayithe ayelokhu esaphila. UMosi wayebanqobile wathatha ilizwe labo.

13 Kodwa abako-Israyeli kabazanga baxotshe abantu beGeshuri le-Mahakha, yikho lokhu behlala phakathi kwabako-Israyeli kuze kube lamhlanje.

14 Kodwa abesizwana sabaLevi kazange abanike ilifa, njengoba iminikelo eyayisenziwa ngomlilo kuJehova, uNkulunkulu wako-Israyeli iyilifa labo njengokubathembisa kwakhe.

15 Lokhu yikho uMosi akunika isizwana sakoRubheni, usendo lunye ngalunye:

16 Isigaba esisuka e-Aroweri emaphethelweni oDonga lwe-Arinoni, lokusuka edolobheni eliphakathi koDonga lawo wonke amagceke adabula eMedeba 17 kusiya eHeshibhoni lawo wonke amadolobho asemagcekeni agoqela iDibhoni, Bamothi Bhali, Bhethi Bhali Mewoni, 18 iJahazi, iKhedemothi, iMefahathi, 19 iKhiriyathayimi, iSibhima, iZerethi Shahari eqaqeni olusesigodini, 20 iBethi Phewori, lemithezuko yasePhisiga, leBethi Jeshimothi 21 – wonke amadolobho asemagcekeni lombuso wonke kaSihoni inkosi yama-Amori, owayebusa eHeshibhoni. UMosi wayemehlule yena lezinduna zamaMidiyani, u-Evi, uRekhemu, uZuri, uHuri, loRebha – engamakhosana amanyane loSihoni – owayehlala kulelolizwe. 22 Phezu kwalabo ababulawa empini abako-Israyeli babebulele ngenkemba uBhalamu indodana kaBhewori, owayeyisanusi.

23 Umngcele wamaRubheni wawulukhumbi lweJodani. Amadolobho la lemizana yawo ayeyilifa lamaRubheni, usendo lunye ngalunye:

24 Lokhu yikho uMosi akupha isizwana sakoGadi usendo lunye ngalunye:

25 Isabelo seJazeri, amadolobho wonke eGileyadi lengxenye yelizwe lama-Amori kusiyafika e-Aroweri, eduzane leRabha;

26 lokusuka eHeshibhoni kusiya eRamathi Mizipha leBhethonimi, lokusuka eMahanayimi kusiya esigabeni seDebhiri; 27 esigodini iBhethi Haramu, iBhethi Nimira, iSukhothi leZafoni lawo wonke umbuso kaSihoni inkosi yeHeshibhoni (icele elisempumalanga yeJodani, isabelo esisekucineni kolwandle lweKhinerethi.) 28 Amadolobho la ndawonye lemizana yawo ayeyilifa lamaGadi; usendo lunye ngalunye.

29 Lokhu yikho uMosi ayekunike ingxenye yesizwana sakoManase, okutsho ingxenye yemuli eyayiyinzalo kaManase, usendo lunye ngalunye:

30 Ummango owawusuka eMahanayimu ugoqela iBhashani, wonke umbuso ka-Ogi inkosi yaseBhashani – yonke imizana yeJayiri eBhashani, amadolobho angamatshumi ayisithupha, 31 ingxenye yeGileyadi, le-Ashithanethi le-Edreyi (amadolobho obukhosi ka-Ogi eBhashani) Lokhu kwakungokwezizukulwane zika-Makhiri indodana kaManase – kungokwengxenye yamadodana ka-Makhiri usendo lunye ngalunye.

32 Leli yilo ilifa uMosi ayelabile lapho wayesemagcekeni eMowabi ngaphetsheya kweJodani empumalanga yeJerikho. 33 Kodwa esizwaneni sabaLevi, uMosi wayengazanga aphe ilifa; uJehova, uNkulunkulu wako-Israyeli, nguye ilifa labo njengokubathembisa kwakhe.